ලෝකෙන්ම ලස්සන බ්‍රසීල තරුණියන්ගේ Beauty Secrets

ලෝකෙන්ම ලස්සන බ්‍රසීල තරුණියන්ගේ Beauty Secrets

ස්ත්‍රියගේ සුන්දරත්වය පිළිබඳව ඕනෑ තරම් සාහිත්‍යමය නිර්මාණ බිහි ව තිබෙන්නේ සැබවින්ම ස්ත්‍රිය සුන්දර වස්තුවක් නිසාය. සෑම රටකම කාන්තාවන්ට ඔවුන්ටම ආවේණික වූ සුන්දරත්වයක් පවතිනවා. ඒ අතරින් සුන්දරතම කාන්තාවන් සිටින රට පිළිබඳව සෑම වසරකම යම් යම් සමීක්ෂණයන් සිදු කෙරෙනවා. නවතම සමීක්ෂණ වාර්තාවන්ට අනුව ලොව සුන්දරම කාන්තාවන් සිටින රට බවට පත්ව තිබෙන්නේ බ්‍රසීලයයි. ඕනෑම කෙනකුට එක් වරක් බැලූ විට නැවත හැරී බැලීමට සිතෙන තරම් ඔවුන් සුන්දර බවයි පැවැසෙන්නේ.

ඔවුන්ටම ආවේණික වූ සුන්දර මුහුණක් සහ සිහින් උස ශරීරයෙන් යුක්ත වූ බ්‍රසීල යුවතියන් උපතින්ම ඔවුන්ට හිමි වූ සුන්දරත්වය රැක ගැනීමට සිදුකරන රූ සත්කාරයන් පිළිබඳව දැන ගැනීමට සැබවින්ම ඔබ කැමැති වේවි.

පිරිසුදුකම සහ සමේ තෙතමනය 

රැක ගැනීම

පිරිසුදුකම කාන්තාවකට අත්‍යවශ්‍යම දෙයක් බව බ්‍රසීල යුවතියන් විශ්වාස කරනවා. ඔවුන් දිනකට 04 වරක් පමණ ශරීරය පිරිසුදු කරන බවයි පැවැසෙන්නේ. එසේම හොඳින් ජලය පානය කිරීමෙන් සමේ තෙතමනය නිවැරැදි ලෙස පවත්වා ගැනීමට ඔවුන් උත්සාහ දරනවා. පොල්තෙල්, ආමන්ඩ් තෙල්, බොඩි බටර් වැනි දේ ආලේප කර හොඳින් සම්බාහනයෙන් ශරීරයේ තෙතමනය ආරක්ෂා කරගනු ලබනවා. එසේම හිරුඑළියෙන් හානි වූ සමටද තෙල් සම්බාහන යෝග්‍ය බවයි ඔවුන් පවසන්නේ. ස්නානය කිරීමට පෙර සුපිරිසුදු පොල්තෙල්, සීනි සමඟ මිශ්‍ර කර මුහුණේ සිට පාදාන්තය දක්වා ස්ක්‍රබ් කිරීම බ්‍රසීල යුවතියන් පුරුද්දක් ලෙස සිදුකරනු ලබනවා.

ඇස් යට ආරක්ෂාව

දෑස් යට කළු පැහැ ගැන්වීම හෝ රැලි වැටීම නිසා වයස වැඩි වී පෙනෙන බව බ්‍රසීල යුවතියන්ගේ මතයයි. ඒ නිසා දෑස් යට නිතරම නිරෝගිමත් ලෙස තබා ගැනීමට ඔවුන් උත්සාහ දරනවා. නිසි පරිදි නින්ද ලබාගැනීම සහ දෑස් යට පෙදෙසට සත්කාර කිරීමත් ඔවුන්ගේ පුරුද්දක් බවට පත්ව තිබෙනවා. දෑස් යට පිපිඤ්ඤා පෙති තැබීම සහ ග්‍රීන් ටී තැබීම දෑස්වලට ඉතා ගුණදායි ලෙස සලකන ඔවුන් අව් රශ්මියෙන් දෑස් යට ආරක්ෂා කර ගැනීම සඳහා සෑම විටම අවු කණ්ණාඩි පැලඳීමටත් හුරුව තිබෙනවා. එසේම හිරු එළියට නිරාවරණය වන සෑම විටම Sunscreen  එකක් පාවිච්චි කිරීමටත් ඔවුන් අමතක කරන්නේ නැහැ.

දෑත් සහ දෙපා සඳහා සත්කාර

අපගේ රටේ යුවතියන් බොහෝ විට අවධානය යොමු කරනුයේ මුහුණ පිළිබඳව පමණයි. නමුත් බ්‍රසීල යුවතියන් දෑත්වල සහ දෙපාවල පිරිසුදුකම හා සුන්දරත්වය පිළිබඳව විශේෂ අවධානයක් යොමු කරනු ලබනවා. ඔවුන් සතියකට වරක් මෙනික්‍යු පෙඩික්‍යු සත්කාර වෙත යොමු වන බවයි පැවසෙන්නේ.

විටමින් ලබා ගැනීම

ශරීරයට අවශ්‍ය විටමින් නිසි පරිදි ලබාගැනීම බ්‍රසීල යුවතියන්ගේ සුන්දරත්වයේ සුවිශේෂීම රහස ලෙස පැවැසීම නිවැරැදියි. වෛද්‍ය නිර්දේශ මත විටමින් වර්ග ලබා ගැනීමට හෝ ආහාර මඟින් ඔවුන්ට අවශ්‍ය විටමින් වර්ග ලබා ගැනෙනවා. බ්‍රසීල යුවතියන් කැරට් යුෂවලට සහ බීට්රූට් යුෂවලට සුවිශේෂී කැමැත්තක්ද දක්වනවා. එයට අමතරව බෙරි වර්ගද ඔවුන්ගේ ආහාරවල ප්‍රධාන තැනක් හිමි කරගෙන තිබෙනවා. බෙරි ආහාරයට ගැනීමෙන් අඳුරු ළප, රැලි වැනි දේ ඉවත්ව යන බවයි සැලකෙන්නේ.

මුහුදු වැලි ස්ක්‍රබ්

මුහුදු වැලි සියුම් ලෙස සකසා ඒ මඟින් සිරුර සම්බාහනය කිරීමෙන් සම නිරෝගි වන බව බ්‍රසීල යුවතියන්ගේ විශ්වාසයයි. ඒ නිසාම බොහෝ බ්‍රසීල යුවතියන් මුහුදු වැලිවලින් සිරුර සම්බාහනය කිරීමට යොමු වනවා.

සිරුර සිහින්ව තබාගැනීම

සිරුරේ හැඩය පවත්වා ගැනීම සහ උසට සරිලන බර පවත්වා ගැනීම නිරෝගී බවේ ලක්ෂණයක් ලෙස සලකන බ්‍රසීල යුවතියන් සෑම දිනකම ව්‍යායාම වෙත යොමු වනවා.

සෙව්වන්දි හෙට්ටිආරච්චි