කාන්තාවන් ස්වයං වින්දනයේ යෙදීම වරදක්ද? – swayan vindanaya

swayan vindanaya

swayan vindanaya

නව යොවුන් විය ඇරඹෙන්නේ රසායනික විපර්යාසයන්, මොළයේ ඇතිවන වෙනස්කම් සහ සිරුරේ ග්‍රන්ථිවල ඇතිවන වෙනස්කම්ද පදනම් කරගෙනයි. එතෙක් ගත කළ ළමා කාලය අවසන් කර දරුවා තරුණ වියට පා තබන්නේ මෙවිටයි. මේ වන විට දරුවා තුළ පවතින්නේ යොවුන් මනසක්. ආදරය, ප්‍රේමය, රාගය, ආසාව වගේම අභියෝගවලට මුහුණදීමේ ශක්තියත් තරුණයකුට ලබාදෙන්නේ යොවුන් මනසයි. මේ වන විට ඔහු අභියෝග රැසකට මුහුණ දෙමින් සිටින කෙනෙක්. අධ්‍යාපනය, විභාග, ආදරය සහ ලිංගිකත්වය ඔහු තුළ අභියෝගාත්මක ලෙස පවතින කරුණු කිහිපයක්. කෙනකුගේ ජීවිතයේ මෙම අවධිය අත්හදා බැලීම්වලට පෙලැඹෙන සමයක්. කෙනකුගේ ජීවිතයේ තීරණාත්මක අවධිය ලෙස හඳුන්වන්නේත් මේ සමයයි.

ඉතින් අද අපි ප්‍රමුඛත්වය ලබා දෙන්නේ නව යොවුන් වියේ පසුවන යං පාඨකයන් අප වෙත එවා තිබූ ඔවුන්ගේ ගැටලුවලින් කිහිපයකට පිළිතුරු දීමටයි.

සුභා – දෙණියාය

වෛද්‍යතුමියනි,

මට වසර 5ක් පමණ වන ප්‍රේම සම්බන්ධයක් තිබෙනවා. ඔහු මගේ මවගේ අයියාගේ පුතකු වීම නිසාවෙන් අපගේ මවුපියන්ගේද ඊට විරුද්ධත්වයක් නැහැ. ඥාතීන් අතර විවාහ සිදුවීමෙන් උපදින දරුවන්ට විවිධ රෝගාබාධවලට මුහුණ දෙන්නට සිදුවන බව මා අසා තිබෙනවා. අපගේ ප්‍රේම සම්බන්ධය විවාහය දක්වා පැවැතිය යුතු යැයි අප දෙදෙනා මෙන්ම අපගේ මවුපියන්ද විශ්වාස කරනවා. එහෙත් මා අසා ඇති කාරණය නිසා දැන් විවාහය පිළිබඳව මට ඇත්තේ බියකි. මා කුමක් කළ යුතුද?

සුභා, මෙහිදී ඔබ දෙදෙනා හා පවුල් දෙක අතර පවතින අනේ‍යාන්‍ය අවබෝධය ඉතාමත් වැදගත්. මේ පැනයේදී ඔබ බිය විය යුත්තේ විවාහ වීමට නොව, ඉන් පසුව දරුවන් බිහිකිරීමේදීය. එහිදී ද යම් ගැටලුවක් ඇති වෙනවා නම් වන්නේ ඔබ දෙදෙනාගේ රුධිරගත සාධක පරස්පර නම් පමණයි. ඒ නිසා සුදුසුකම් ලත් වෛද්‍යවරයකු ලවා ඒ සාධක පරීක්‍ෂා කරවා ගැනීම ඉතාමත් වැදගත්. ඔබ මානසිකව ඒ ගැන සිතමින් නිකරුණේ බිය වීමට අවශ්‍ය නැත.

කුෂාන් – හෝමාගම

වෛද්‍යතුමියනි,

මම වයස අවුරුදු 20ක තරුණයෙක්. තවමත් මා හට පෙම්වතියක් නැහැ. මම දවසකට දෙවතාවක් පමණ ස්වයං වින්දනයේ යෙදෙනවා. එම අවස්ථාවලදී නිල් චිත්‍රපට බැලීමටද පුරුදුව සිටිනවා. ඒවායේ සිටින පුරුෂයන්ට මෙන් විශාල ශිෂ්ණයක් මා හට නැතැයි කියා ඒ සෑම මොහොතකම මගේ සිත මට පවසනවා. දැන් මට නිල් චිත්‍රපට බැලීමට හෝ ස්වයං වින්දනයේ යෙදීමට වැඩි කැමැත්තක් නැහැ. නමුත් වරින් වර කලින් කී සිතුවිල්ල මගේ සිතට පැමිණෙනවා. එය මට විශාල මානසික පීඩාවකි. ඉන් මිදීමට මා හට උපකාර වන්න.

කුෂාන්, ඔබ තුළ පවතින ඍණාත්මක සිතුවිලි බැහැර කිරීම මුලින්ම කළ යුතුයි. ඔබගේ දේහයේ ප්‍රමාණයට ලිංගික අවයව වර්ධනය වී නැත්නම් පමණක් වෛද්‍යවරයකු හමුවීම වැදගත්. එසේ නැත්නම්, ඔබ සාමාන්‍ය පිරිමි ළමයකු ලෙස සිතා හා සිතිවිලි පුහුණු කළ යුතුයි. ඔබ නිල් චිත්‍රපට බැලීමට ඇබ්බැහි වී ඇත්නම් එයින් මිදීමට ඊට වැය කරන කාලය වෙනත් වැඩකටයුත්තක් සඳහා හෝ පවුලේ සාමාජිකයන් සමඟ ගත කිරීමට වැය කිරීම වැනිදෑ කළ හැකියි. එමඟින්ද එයින් මිදිය නොහැකි නම් සුදුසුකම් ලත් මනෝ උපදේශකයකුගේ සහාය ලබා ගන්න.

රොෂාන් – මාතලේ 

වෛද්‍යතුමියනි,

මම ඇය සමඟ විවාහ වූයේ පසුගිය ජනවාරි මාසයේදීය. එය යෝජිත විවාහයකි විවාහයට ප්‍රථම අවුරුද්දක පමණ කාලයක් අපි ආශ්‍රය කළා. නමුත් කිසිම දිනක අපි ලිංගිකව එකතුවී නැහැ. විවාහයෙන් පසුද මා ඒ සඳහා ඇයට යෝජනා කළත් ඇය ඊට දැඩි බියක් දක්වනවා. අප මුණ ගැසීමට පෙර  අෑට පෙම්වතුන් දෙදෙනකු සිටි බවද මා හට අෑ පවසා තිබෙනවා. ඔවුන් දෙදෙනා සමඟද ඇය කිසිදු ආකාරයක ලිංගික ඇසුරක් පවත්වා නැහැ. ඔවුන් අෑට බලපෑම් කළත් ඇගේ අකැමැත්ත නිසාවෙන්ම එම සම්බන්ධතාව බිඳ වැටුණු බවයි අෑ මා හට කියා ඇත්තේ. මෙය රෝගී තත්ත්වයක්ද? නැතිනම් අෑට වෙනත් සම්බන්ධයක් ඇති නිසා ඇය මා හට බොරු කියනවාද?

රොෂාන්, මෙය ඍජුවම රෝගී තත්ත්වයක්ද, නැත්නම් බොරුවක් කරනවාද යන්න පැවැසීම අපහසුයි. සමහර ගැහැනු ළමයින් තම යෙහෙළියන් සමඟ සිදු කරන සංවාදයන්හිදී ලිංගිකව එක්වීමේදී වේදනාවක් ඇති වෙනවා යන්න අසා ඇත්නම් ඒ සඳහා බියක් දක්වනවා. ඇය බොරුවක් කරන්නේ නම් ඒ  සඳහා හේතුව කුමක්ද යන්න සොයා ගත යුතුයි. මේ සඳහා ඇය සහ ඔබ යන දෙදෙනාම සුදුසුකම් ලත් මනෝ උපදේශනයකට යොමුවීම ඉතා වැදගත්. එහිදී ඔබ දෙදෙනා වෙන වෙනම සාකච්ඡාවට ගැනීමෙන් මෙසේ වීමට හේතුව තහවුරු කර ගත හැකි අතර ඉන් අනතුරුව ක්‍රමානුකූලව උපදේශනයක් මඟින් මේ තත්ත්වය මඟහරවා ගත හැකියි.

අනූෂා – වාරියපොළ

වෛද්‍යතුමියනි,

මම අවුරුදු 17ක් වන පාසල් ශිෂ්‍යාවකි. මගේ පන්තියේ බොහෝ මිතුරියන් ස්වයං වින්දනයේ යෙදීමට පුරුදු වී ඇත. ඔවුන් ස්වයං වින්දනයේ යෙදෙන ආකාර පිළිබඳව පන්තියේදී කතාබහ කරන හැටිද මා දැක තිබෙනවා. ඒවා අසා සිටිද්දී මටද ස්වයං වින්දනයේ යෙදීමට කැමැත්තක් ඇති වෙනවා. නමුත් මට ඒ පිළිබඳව බියක් දැනෙනවා. වෛද්‍යතුමියනි, කාන්තාවන් ස්වයං වින්දනයේ යෙදීම නරක ක්‍රියාවක්ද?

අනූෂා, මුලින්ම ඔබේ සිතුවිලිවල වෙනසක් කර ගැනීම අත්‍යවශ්‍යයි. ඔබ මේ අවධියේදී මූලිකත්වය ලබාදිය යුත්තේ ලිංගිකත්වයට නොව අධ්‍යාපනයටයි. ලිංගිකත්වය ජීවත්වීමේදී අත්‍යවශ්‍ය නමුත් ඔබට මේ කාලයේදී වඩා වැදගත් වන්නේ උසස් පෙළ පිළිබඳ වැඩි අවධානයක් යොමු කිරීමයි. ඒ සඳහා ඔබගේ මනස කාලසටහනකට අනුව වැඩ කිරීමට හුරු කළ හැකියි. එම අනවශ්‍ය සිතිවිලි ඇතිවීම වැළැක්වීමට පාඩම් වැඩ සමඟ මනස කාර්යබහුල කර ගැනීම වැදගත්.

වෛද්‍ය ආර්. චන්ද්‍රිකා රාජපක්‍ෂ

මනෝ උපදේශිකා

ශ්‍රී  ලංකා වෘත්තීය මනෝ උපදේශකයන්ගේ සංගමය

ශ්‍රී  ලංකා පදනම් ආයතනය